我食乜、佢食乜？？

都接近4個月囉，個肚鑼咁大囉，成個特晒出黎，上星期放左成個星期假，日日都唔係訓就係食，個肚足足大左成吋呀，而家真係有33吋呀，真係肚腩大過咩囉．．．哈哈！

而家都仲未係去到食到開行既階段，食左ｄ難消化既既都會嘔架，但係好左好多架啦，開始食番多ｄ對虾仔有益既野，例如雞旦呀、鮮奶呀、果仁呀、芝士咁囉．不過原來LEE d咁有益既食物我係一樣都唔鍾意食既，日日都係比呀虾仔daddy迫我食架．．．！
不過我都會簡我鍾意食而又有益既野，下面歌ｄ全都係我既主要食糧黎架．



不過今日實在忍唔住啦，口喝到呀媽都唔認得，咁咪一口氣吸晒一罐係雪櫃攞出黎既可樂呀，不過我一面飲，一面就有以下LEE幅圖出現．．．勁攪笑呀！（你地click入去睇下啦，放大ｄ睇會清楚好多架，係我畫架）．

Christmas Party I

公司今日攪聖誕Party， 係九龍站個圓方商場包間餐廳食Tea Buffet同埋有抽獎囉， 跟住就公司請睇"投名狀"．因為往年又冇參加公司的party，今年我又有特別優惠，乜都唔洗負責，所以抱住有得玩有得食既心態去參加，都幾開心．．．但係邊個話陀仔好好運架．．．我一個奬都抽唔到呀．．．＞＿＜（唔開心）！

值得一讚既就係圓方lee個商場，佢係九龍站上蓋．．．姐係D有人錢住既地方囉，咩凱旋門呀，漾日居呀等等等等呀．佢英文叫做Element，幾有心意架，個商場裏面分左金、木、水、火、土幾條通道，有lee幾樣元數，所以叫做圓方囉．

睇完戲係商場行左個圈，發現商場有個玻璃窗，裏面有幾條友，個個都一模一樣，原來係要猜出邊一個係真人喎！心諗：邊個諗架lee D野出黎架，個真人咪好慘，座係間房到，又唔可以動，唔可以轉眼，連吞口水大力ｄ都唔得喎，變態既玩意！

我個頭呀

今日走去剪頭髮，一起身食少少野就即刻去啦，因為知道我幫襯開個髮型師好好生意架啦，平時閒閒地等成粒幾鐘；咁咪諗住做第一個客唔洗等囉．

唔知條友今日係咪姨媽到（個髮型師係男人黎架），應該係姨長到呀，黑口黑面喎，咁我都扮冇野啦，等佢開聲問我想點剪先答佢啦，我話想留番長D，修下ｄ陰咁囉；佢就話不咁同你剪D層次同埋偷薄D啦；咁都好呀！剪剪下發覺唔係好對路啦，點解咁短既，我咪問佢囉，佢話偷薄左係咁架，長度冇變架．．．我都算，諗住夜晚洗頭方便D．．．再問佢：

我：會唔會要攪好耐先出到街架？
佢：你唔整佢都出得街架啦，睇要有咩要求姐．．．
我：（興興地）我冇要求就唔黎髮型屋啦，我黎做乜呀？
佢：剪短D頭髮囉
我：如果我冇要求都出得街，我自己剪都得啦，洗乜搵你呀？
大家都靜晒，全程我塊面黑過個獲，一句聲都冇出，臨走仲要張件外套"發"一聲咁放係張椅到．

我明明話要留番長D,有乜理由仲同我剪到成個男人咁先得架．．．離譜架簡直！

而家（唔記得14定15週囉），睇下我個大肚臍！

唔記得介紹我個friend比你地識添...同我一齊影相個隻叫做"古惑星"，平時都係佢陪我多既，所以比佢出下鏡囉！

過著艱苦日子既蝦仔Daddy

近幾個月都因為呀蝦仔攪到我好多野都做唔到，一放工就攤係到，咩都做唔到．．．連我最喜歡既煮飯仔都冇我份囉．好掛住整蛋糕，好手癢．．．等我精神番一定要從出江湖！！

你睇我個天地已經比蝦仔daddy佔據左啦，而家佢係廚房既時間仲多過我呀．因為大部份既家務都係由佢負責呀．睇下佢係到攪乜鬼，原來係整湯圓．．．有我既精心教導，你睇效果都唔錯架．．．唔食得，起碼都睇得．．．哈哈！

其實呀蝦仔daddy真係好辛苦架，又要返工，放左工又要去老遠既地方返學，長途拔涉咁又要由學校返屋企，返到屋企都成10:30囉，咁夜先食飯，食完飯仲要洗碗，跟住就洗白白訓教架啦，有時睇下電視攪下電腦都要成兩三點先訓架．．．好辛苦呢！ 所以呢，有時佢口黑面黑咁，我都冇發佢脾氣架．．．當做睇量下佢囉

年尾清假

因為年尾要清晒d假，所以陸陸續續都有假放，真係疏乎呀．．．不過，一有假放我都會返多ｄ長洲，因為係長洲有尊人照顧我呀麻．．．hehe!　雖然係悶ｄ，但係有奶奶成日煲豬骨湯比蝦仔補身，又有好多新鮮好味既餸食，人都精神ｄ呀；相反如果要留係屋企，角色就會調轉囉，我就係個要照顧人既尊人囉，要買餸煲湯等老公放工返黎食．．．唔制呀，放假仲要做咁多野，有時間仲要清潔埋屋企添呀．．．打死一個人放假既時候都唔留係屋企呀．．．

可能放左假，休息多左啦，人都精神左呀，仲有精力去行街添囉．想買ｂｂ野，但係又唔知蝦仔係男定係女，ｄ野大減價都買唔落手．大件既傢具都唔敢買，都唔知有冇位放，得個行字！


我都係買番我老本行既野啦－食物！我今早先逗留係super store幾粒鐘，張ｄ野食一睇再睇，最後都係忍唔住要買啦．

而家仲係怕一食即嘔，但係都忍唔住啦，買左先算啦！話晒ｌｅｅ　ｄ平時都係我主要既食糧黎架麻，屋企點可以缺少架．．．不過我諗最後都係益埋蝦仔個老豆囉！




不怕話你知呀，有咁耐風流，就有咁耐XX啦，你睇我幾可憐，而家既零食得番ｌｅｅ　ｄ架炸．．．鹽餅乾、梳打餅同埋水泡餅．因為ｌｅｅ野落左胃會吸走ｄ胃酸，無咁易嘔喎！！


而家望到ｌｅｅ幾包野都嘔呀．．．又無味，食完個口干到呀媽都唔認得！