夢中情人

唔知點解近排不時想起你，很喜歡重溫你的相片和聲音，彷彿我好想與你有一段不顧一切的關係，你的面容有點改變，看上來不再年輕，工作很辛苦嗎?家人有給你足夠的照顧嗎?

你就是站在我的面前，但大家的距離是那麼的遠．只有你一個人時，你好像有意無意地慢慢跟著我走，彷彿等我跟你說話，但我只能跟你嫺聊，有口說不出，有話不懂說，真不是味兒！還記得一個夢提醒了我，原來我是那麼盼望跟你一起的，對，我對你那一份感情原來是没有變的．

我知道今生都不會與你開花結果，但你還是會遐想跟你不時都碰上，見一個面也是心靈上的滿足！

女人vs男人

我以前睇到D無理既女朋友好睇唔順眼，成日都覺得要尊重下D男人，個男人扮到好似隻狗咁，比你都唔鐘意啦．這是我以前既想法，所以我都會尊重佢地既．但係近來既想法唔同左，覺得男人係絶對應該遷就女人既，遷就已經係遠遠超於尊重好多好多啦，我既意思係唔單止要尊重，仲要無條件咁寵愛呀．


點解：因為某些男人某程度上係唔識點樣表達佢地既愛．同埋因為時間既問題，佢地會越來越唔識得愛身邊既人，疏忽對佢地既照顧，忽略左身邊人既感受；相返一對男女相處耐左，大部份女人都係受氣既一方面(或者兩口子都在受氣，只係唔同既氣)，女人顧全既野都會比較全面，意思是委屈或者面對困局既機會都比較多．雙管齊下，煩既野又多左，比人照顧既機會又小左，仲要日子耐左，個樣又老左，三管齊下，女人受既壓力係咪谷到一個好得人驚既地步呀！


要面對既困難其實大部份都難唔到佢地既，只係間唔中不停講不停講，發洩就可以平衡下；而老既問，睇化左就會無事啦，個個都係咁上下...老架啦!而我想講就係男人應該要無條件咁遷就女人，好簡單就係因為佢地好辛苦囉；叫你愛你又唔識點愛，咁咪遷就下囉，唔好咩都頂咀，唔好咩都話唔好，最好咩都話老婆啱，老婆既主意係最好，老婆既安排實在太好...hahaha!諗下都開心!最少你都要欣賞佢為你做既一切事與物啦，而感謝佢地既存在啦!　

點解大家都唔可以把結婚那一刻既心情勞勞咁銘記係心呀！

　　　　

係咪相同架個道理?

年紀真係大左啦，只係打左一晚通霄牌，足足攰左我整個星期呀，晚晚約十一點就全身乏力，攰到好似打仗咁，仲要係一訓落牀一分鐘唔洗已經係熟睡狀態;其實都唔係唔好既，最起碼我既睡眠質數應該唔差，因為全程係熟睡既；但係唔好就係夜晚無晒時間用囉．

撘7點船，返到去都7:30，食飽唔洗洗碗都要8:30啦，同個仔玩一陣，9:00又要入房開始陪養感情訓教，等得個仔訓著都差唔多10:00，仲要洗澡，攪掂所有野最快都要10:30，勤行半個至一個鐘，已經攰到連睇埋新聞報導都頂唔住...試問仲邊有時間做其他野呢?

但係我昨天睇到一幅咁既相，真係幾攪笑，我諗我應該都有小小都可以擠出黎既，未至於真係乜都無既...哈哈哈！

　　　

財迷心竅

近來公司有人攪小動作，又用請辭來半威脅老闆，真係悶呀，我真係會覺得lee種人無乜出色，你有能力的話，人家一定會留你，你又話要生又話要死咁迫公司比多小小你，低妝都死．

其實我都一早睇串lee條台灣佬啦，成日笑笑口，又成日買野比我地食，又請我地出去食飯，一早感覺到佢既熱情係有原因啦，不過仍然好多人中左佢招，到今時今仲覺得佢係好人．我討厭佢就係放他的親信入我地既圈子來套我們的說話...太無聊．雖然我公司係做投資，但其實生意都係建基於人與之間既關係，人既心念一定要正，根本唔可以存歪念，我覺得佢真係錯在以為自己太聰明和想別人既想法想得太多了，以為可以控制到我們既想法，太自以為事了．

一個人唔安守本份既下場就係咁架啦，佢係對公司貢獻左好多，但從來付出同收入都唔係正比架啦，你要計較用你自己既方法去取一些原本唔屬於你既野，就會野來好多投訴架啦．道理係簡單，但係財迷心竅，又係控制唔到既，另一個角度睇，可能佢都是受害者！

煩悶既日子

近來因為天氣不好，呀仔就傷風流鼻水又發下燒，真係頭痛．呀仔唔舒服又成日哭，一大哭又一定要搵呀嫲，搵唔到又激哭，連媽咪都唔要，攪到我勁有錯敗感，原來我係第二最受...唉！我都想做好個好媽媽架，我都你我可以給你依賴架，我都想做你既第一最愛架，但係要返工，唔係一手一腳揍大你，你實會無咁痴我架啦，我又有乜辦法喎！！

同老人家住係可以幫到好多手，但係無晒私人空間，想同個仔獨處下都無．有時真係好忟，好似今朝咁，呀仔成晚哭我地已經無教好訓，天光又要趕返工，心情已經極想死，老爺仲要係度煩住晒，又話要帶個孫出去睇醫生，又係到講咁耐都味好番，又乜又七...真係火都黎，有時博佢一兩句咀又黑口黑面，返工又要睇人面色，返工屋又要睇佢面色，人都癲！

再講而家天氣真係唔知想掂，今日著短袖，明天又要著厚褸，真係一年四季既衫都要攞晒出黎．大佬呀，我間房豆乾咁細，真係緊緊夠三個人訓呀，仲要加埋三個人既四季衫同其他用品，真係屈死人呀！