爆炸

近日真係好辛苦，返工日日都係打仗咁，日日都係deadline，趕到真係有氣冇得炓；
加上我個肚又大大個喎，毛神神重多廿幾磅，行又唔行得快，做野急個心又跳得快，攪到鬼死咁唔舒服；
腰骨又痛，訓得唔好，精神就緊係唔好啦，惡性循環；
又要考試，一小小得閒就要溫書，簡直係勞役呀；
又好以冇人關心我咁，私事又好公事又好，乜都要自己做，連唔開心都要自己安慰自己．

身邊條友又係忙都乜咁，返工、OT、返學．．．返工、OT、返學．．．返工、OT、返學，所以佢都成日係到埋怨．．．日子好難過呀，好辛苦呀．．．我就係旁邊收晒佢ｄ負能量！

唉．．．加加埋埋我自己都平衡唔到，好鬼死唔開心．今日終於忍唔住係放工返屋企既時候哭左出黎，但當我低頭想抺眼淚時，見到虾虾特然係到旭下旭下，旭到係肚面都見到，好以幫我打氣咁．咁我就心情有ｄ複雜，點解我一ｄ都唔享受虾仔係我肚裏面既日子，又唔打扮，成日諗住等佢出世先算，成日掛住公司ｄ野，一ｄ都冇放心機落去佢到，諗諗下好以對佢唔住咁．

境涯實在太低啦，一時之間都消化唔到，唉！咁辛苦都唔知為乜！好想好想去旅行，興趣一下，起碼要比我知道點解要咁辛苦呀！

鼠年口號

新年太忙啦，又要週圍去拜年，又要霸住個位打麻雀，又怕派錯利是（同樣緊係怕收漏利是啦），日日訓醒都有野做，忙過返工呀！

過到初四終於可以休息下啦，返屋企打掃下，訓下教．．．係得閒既時候就諗下2008年既大計啦！咁我就訂下左08年的口號：

每天都唱題！
（實行左兩星期，因為早左起身，所以早座係冇問題既；但係放工返黎太多家務要處理啦，晚座同埋15mins既題目返而成日冇時間做．．．努力呀，要keep住呀）

儲多D錢！
之前有都冇乜儲蓄既習慣架，今年的起心肝儲下錢啦．．．由散銀開始，每天儲5大蚊啦．．．haha!

每天早D起身！
成日話每朝起身返工都好鬼辛苦，但係比人問到我幾點起身呢，就會比人怒啤，因為8:30起身都話辛苦喎！咁我就改善吓囉，而家8:00鐘起身，做下運動、做埋早座、整埋早餐先返工！

鼠年2008

過左新年都成個兩個星期囉，不過今日（都年十三囉）仲逗到利是喎．．．哈哈（真happy)

今年新年前好愁架，花紅出小左喎（比我預計的數目），咁諗住想買既野呢，又已經冇得買啦；又要交稅喎，咁過年又要搵錢包利是啦，又要買野比ｄ姨媽姑姐呀舅公舅父呀乜乜叔叔伯伯呀．．．又要比錢ｄ長輩呀．．．等等等等，九萬幾樣開支．．．份花紅買小見小．．．點知而家過完年，盤點後發覺：真係意料之外，可能好心有好報．．．個個既利是都有番咁上下份量，等我都唔洗咁傷．

今年新年既賭運真係呀．．．差到你唔信呀！玩乜輸乜呀（打麻雀、魚蝦蟹、骰寶、啤牌呀），以我咁既賭性，都怕怕呀，賭到初四，寧願訓教都唔啦！今年又唔係犯太歲，都唔知點解黑到咁．．．（冇心機呀！）

食物既份量

以前覺得麥記一個餐好多架，食得晒都飽到呀媽都唔認得，唉．．．而家食左個包之後，食埋個薯條，仲好以差ｄ咁喎，點解個餐咁少既．．．仲未飽喎；同埋以前食個早餐A可以飽到三四點，但係而家食完個早餐，反到屋企仲好以肚空空咁．點解會咁架？？

虾仔爹地成日都話我：唔好食啦，你過肥啦，營養過剩呀．．．
跟住我一定會嘴妙妙咁bear住佢．．．然後照買黎食．．．hehe!

其實我都唔覺得自己大食喎，但係又見個磅數日日咁升喎．．．真係奇怪呀！不過今日見到自己食野都有ｄ得人驚．．．先來一個湯面，唔係好飽喎．．．再黎三隻小籠包．．．都唔夠喎．．．最後仲要食多半個痴飯．以為好飽啦，點知一出門口就諗緊再買ｄ咩食呀．．．（攪到我自己都有ｄ驚添）！

上次見醫生已經話我重得快架啦，食既野多過虾仔要既野喎，而家重得仲快．．．大獲！真係唔知黎緊個幾個月點算呀！