基本的禮貌

大熱天時真係郁下都出晒汗呀，我由金鐘行到碼頭整個背脊都已經濕晒，仲要係太陽都落左七八成啦，都係咁鬼熱；可能係長時間都係室內工作，唔特別討厭夏天，仲幾鐘意添，感覺好有活力呀，好舒服呀，舒服在於熱既可以開冷氣，個身涼左可以街出去晒下太陽；坐沙灘雖流晒汗，但係D風吹埋黎又好爽喎，熱得緊要又可以跳落超冰涼既海...諗下都超爽呀＠＠

但係呢，成日係巴士、船，lee D咁密封既地方問到超臭既汗味呀！！真係臭到人會暈架大佬，仲會嘔添呀！！有時諗下都覺得D公共交通既坐位真係充滿左好多好好多好多菌架，D人咁鬼臭坐落去，張登吸唔到D汗都吸到D味啦，諗下都想嘔呀！

唔係話出汗有罪，但係大家都應該顧下一D基本既禮貌啦，出街做野既，帶多一件衫換囉，濕完又乾，乾完又濕，實臭啦，換又佢咪好D囉；放一支細細支既香水係袋，實有用架．一個較為注意自己外表既人點講都唔會比自己臭到咁係D共眾地方出没既！

有壓力未解決

近排情緒有D低落，好似事事都不如意咁．返工又提唔起勁，放工又唔想返屋企，但係好掛住個仔，無奈都係要返架啦！堅堅又事事都頂撞我，我覺得好煩呀！我都有諗過係咩原因架，可能係：

好想返柴灣，因為歌度係我屋企，鐘意點就點，落街行下又方面；係長洲無乜地方好去（因為天氣唔好掛）；我地間房真係好細，成日都無位擠野，日又汁，夜又汁，汁黎汁去都係咁，打破唔到一個悶局，覺得好厭悶．總之就係唔係好想留係度啦，真係無乜歸屬感，個人都坐唔定既，一靜落黎就想離開，去太婆到、去四嬸到，去邊度都好，就係唔想留係度；其實我都唔知點解！

雖然係狗竇，但係話晒都係我屋企！


天氣好濕熱，呀仔D皮膚又出疹，好戥佢辛苦因為勁痕；比人揍就係咁架啦，有咩都唔出得聲（其實我都知呀嫲係鍚個孫仔既，但係有時我都要發洩吓），有乜理由30度都仲著兩件衫，攪到個背脊起晒汗疹架，有乜理由用咁小餸黎煮飯仔架，佢唔食都可以理解啦！有乜理由你比野佢食又得，我比小小野佢食又係度比說話我聽呀，成日要控制住個仔食幾多野，食完奶又唔可以食麵包，食完飯點解可以食雪樣呢；我已經唔係好滿意架啦，堅堅仲成日係耳邊煩，叫我唔好比li樣呀歌樣呀佢食，我心諗我咁多不滿都無正面話過你屋企人，我叫你出聲你又唔出聲，倒番轉頭又黎煩我，我境崖高既時候都可以當佢唱歌，境崖低既時候我就係咁架啦！壓力保都會爆炸啦！

世風日下

暑假又到啦，長洲多左好多青少年黎度假，連平日都好似假期咁擠迫，就連我夜晚去東灣跑步都多左好多人，一對對小情侣去東灣曬月光，真係唔錯既，既浪漫又慳錢...haha.

不過尋晚竟然比我見到一對情侣訓左係沙灘，正確應該係話"踏"住訓係沙灘，個女仔係個身到拉左一個黑色物體出黎，我無眼花既應該係一個黑色既Bra...當時即時想停低企係度睇下咩事啦，但係又好似好尷尬咁喎，都係留番比堅堅做啦，一度跑一度話比佢聽，佢當然係跑慢ｄ係度望野啦...問佢望到乜，無喎，無除褲喎！＝＝！睇四仔咩除埋褲！

小情侣無法無天，拖下手、鍚下咪算囉，仲要除埋Bra，仲要係咁露天既地方，真係無眼睇！
路過既人，咁激烈既場面仲唔夠，仲想睇埋除褲，更加無眼睇，哩個咩世界！

對人唔係對事

我真係無言以對，由始至終你都一個咁殘酷的人，你每次處事的做法我都唔認同既，我只係無奈！

更奈何就是你是的父親大人，我又可以怎樣對等待你呢？雖然我極度不滿、極之厭惡、完全唔可以接受你既行為及想去，但．．．以我同你既關係，真係無辦法直斥其非，拍枱指責你既無良心行為．

我之所以可以張事情係度講過明白都係因為我昨天係報紙睇到一個研究報告，我地認為冷血無情、有暴力傾向的人其實係大腦裏面有一伙"杏仁體"在成長時缺乏某些物質而道致的，診治既黃金時期係發育時，過左就無得醫架啦！所以我堅持相信我老豆係成長時缺乏以上所講既物質，當然都唔會有人為意！就係因為這段小小的報告，我才找到原因去原涼你．

戲玉就係：屋企有一隻年時己高的狗，佢叫Jacky，年青時外貌非凡、英姿澟澟、人見人愛．隨著我搬離開他們再加日月如梳，佢近一兩年已經變成一頭老狗，仲氣速得得好嚴重，當係自然現象啦．其實大家都心裏有數，Jacky要離開我們的日子已經不遠了，係我心裏面亦都知道Jacky終有一日係要做人度毀滅架啦．但係佢可惡既主人竟然張Jacky交左比捉狗隊呀．．．我真係無辨法接受，經我哭住咁質問我老豆既時候，佢比左一個我無辨法原諒佢既理由我．．．我唔供開真係唔想張老豆既形象降低到零或以下．

死就係一定架啦，點解唔可以死得有尊嚴一點呢？點解係死前唔可以有至親相伴呀？死已經好悲慘，仲要加上在惶恐之下發生，我覺得這件事我好難接受，話晒我都係佢半個主人，話晒佢都帶過很多很多歡樂既時光比我，係佢要死之前我都盡唔到半點人情，我覺得自己都無奈．倒轉頭諗，如果唔我帶佢入黎我屋企，佢既下場可能會好好多，害到佢咁其實係我既問題．

母與女

堅堅既婆婆剛剛過左身，其實一點都不突然，呀婆年時己高，大半年前已經行動不便，入住老人院，長期臥牀休息，就連進食都要人餵食，糖尿病很重，腳部的傷口已經不能自動康復，還有蟲添....試問一個這樣的老人家過了身又有什麼突然呢？



我接觸呀婆的時間不多，相處的時間更少，得知她最多消息是從她七名女兒的口中，呀婆的日常行為已經成為她們茶餘飯後的話題，但絶大部份都是投訴多，說她這樣不好，那樣不對...我不是置身其中，我感受不到她們的煩擾的心情，但....我只看到當初呀婆一個媽媽養大她們七個女一個仔，今天的日子倒轉，她們六個女一個仔照顧媽媽一人，為何大家都要多多投訴呢？


六名仔女長大成人，各人的生活都活得不錯，但婆婆仍要入住老人院（其實我都係老思想，感覺入住老人院係好孤獨），只有最細既女每天都會去探佢同餵佢食飯，其他的以我所知都係"有時間"就會去啦！係整個喪禮最領我深刻感動的就係呀婆其中一個女輕輕的對我講：下世都想做呀婆個女．
任我多痛惜我的父母，到現時都没有想過來世都要做他們的女兒，所以這句說話令我刻骨銘心．