X'Mas 2008

今年聖誕過得好平淡但係好開心，可以同朋友開左個開心既平安夜，又可以同屋企人開左個聖誕聯歡會，更可以一家三口過左個平靜既聖誕節．

平安夜好驚訝好多單身既朋友仔都攜卷出席，真係唔聲唔聲嚇你一驚喎，好呀有新鮮感~~Fresh既感覺呀~~!!
再加上有d好耐無見既couples又出現喎，真係幾開心！

聖誕節又係我一灌既作風啦，享受下家庭樂，同呀妹一家人係屋企開個大食會，不過由於時間太趕．．．d食物實在太馬虎啦，雖然都食得飽但係唔係幾滿意，下次要整好d先得．

根住就係一家三口係柴灣靜靜地過左個假期，正到爆呀！係無人打攪既情況下同呀仔孤男寡女共處一室，發現原來呀仔真係幾乖架，仲識唱歌添．．．hahaha!!

群眾壓力

公司又傳出裁員消色，早知比遲知更難受．．．

其中一位係主角係被同部門的人排斥，理由係瀉膊同懶惰；我同佢並唔係同一個部門，我無親身經歷佢既惡行，但係每次我給她的email，她都會很快回覆．

我想講既係佢比佢既部門柸葛，一傳十，係我地成間公司都八婆仔既情況下，其他部門都柸葛佢．．．可以想像情況會係點啦．其實同佢無直接工作關係既人點解都要柸葛佢呢？佢地有受影響嗎？

恐怖既係有人收到消息下會覺得開心，點解咁要咁黑心呢?同部既人憎恨佢可以理解，如果佢真係所講咁既話；但係同佢唔同部門既話，點會要開心呢？你可知下個可能就係你呢？

情緒低落

平時一到十二月就興奮架啦，聖誕節有好幾日假放下，跟住好快又係我最喜歡既龍曆新年，又可以熱熱鬧鬧咁一家人大事咁大賭一番啦．．．haha...諗下都開心呀！

今年既十二月乜mood都冇呀，一來減左人工啦，無乜消費mood，幾經辛苦抽到半日時間行下街，諗住滿足下我既購物慾，行下街買下野開心下啦，出奇，零購買慾，都味試過行街行到打喊路，兩手空空咁返屋企既，真係前所味見．．．算吧啦，留番d彈藥！

二來又唔知有冇花紅呢，心大心細，不過都打定輸數，唔開心就緊架啦，不過大圍經濟都咁差，算啦！

三來近來EQ激低，一沉不起，成日都好似唔係好開心咁，又唔係發生左d咩大件事，日日都正正常常呀．．．唔通精神病又發作！！

貪、瞋、痴

近排睇左一篇指道印象都幾深刻，係講"貪、嗔、痴"

貪：固明思意係貪心啦，除左講貪圖利益外，仲可以講為貪圖別人對自己的欣賞、讚美；總之就係想要一些不屬於自己既事同物．

瞋：就係心裏面有仇恨，把人家的惡習放在自己心裏，把別人當為自己既宿敵．

痴：就係痴戀事與物，失去理性地痴戀、迷戀，最終都是會傷害自己的．

人既唔開心往往都是離不開這三件事情，細想一下，又好似係喎．

我會覺得身邊既人唔了解我某些決定．
（貪，貪圖別人的量解．其實其他人理解與否都改變不少我的決定，為何還因為別人的不理解而不快？）

我最憎歌條友，講句埋都衰過人．．．
（瞋，你已經對這個人有偏見，無論佢講乜、做乜你都係會睇唔順眼架啦）

我覺得我個仔係全世界上最可愛最乖既小朋友．．．
（痴，痴戀自己身邊既人，事情會變得麻木，對事會變得主觀）

有事情困擾既時候，不防分類，然後用客觀既睇法去理解，好多時候用第二個想法去理解同一件事，好可能會唔再困擾架！

週年記念日

成日都聽到人話幾多幾多週年、乜乜物物記念日要去慶祝．．．成日聽到女仔朋友怪個男人咁都唔記呀，記得又無表示呀．．．男既朋友又成日話：唉，死啦，買咩好呢，去邊到好呢，頭都爆呀．．．

對於我呢．．．我係咩記念日都無架，有時差d連邊日結婚都唔記得添呀，大佬呀，出門又一日，註冊又一日，鬼記得咩．．．我並唔係耐左所以唔記得，我根本就係無記過．．．哈哈哈！！

我只係會記生日，大部份好朋友既生日日子我都記得．記生日已經好足夠啦，一家三口，一年都要慶祝三日啦，況且一家唔只三口呢，有呀爸呀媽老爺奶奶等等等等．．．一年都食唔小次飯，慶唔少次祝啦，如果再加埋乜乜物物記念日要去慶祝，咁咪機乎要隔日就慶祝．．．

我咁簡單，我老公應該好開心啦（我估）！！

你睇，是旦都搵到咁多慶祝生日既相呀．．．

我們的祖國

中國真係進步左好多呀，不得不讚呀．

老豆上星期返左自己既祖鄉，話尋根喎．．．緊係尋唔到啦，都只係到此一遊呢！



回鄉途中，係長途巴士上，佢除外套既時候一個唔小心趺左個相機喎，當時佢緊係唔知啦，知道就擺番啦．．．仲要返到酒店先知喎，番相倒弄都搵唔到，好啦，打定輸數係唔見左架啦！
到回程既時候，一去到車站攞車票既時候竟然見番同一個派車票女仔喎．．．咁緊係問佢有冇見過個相機啦，真係估都估唔到呀，個女仔叫左個車長出黎，一輸對話後，竟然比番個相機老豆喎．．．老豆緊係識做，比小小小費佢地啦，佢地竟然話唔要添喎．．．嘩嘩嘩嘩，真係十萬個驚訝呀！！！

佢地有奉公守法既行為已經值一百零一分架啦．．．再加埋唔要小費既既高尚情操簡值令我刮目相看呀．．．勁呀，中國人加油呀！！

論理關係

雖然我是獨身女，但係我家族頗大，有很多堂兄妹、表姐表妹、表叔表姨、表舅父呀等等等等．．．數之不盡．．．

要我好清晰咁將佢地分回別類，我一定做唔到；我只係會張佢地分兩類，親or唔係好親．
就算論理關係唔近既，但日日見，都變成親啦；相反，同你幾親既人，一年都見唔到一次既，親極都有限．

要維繫好好既感情一定要靠時間，小時候一齊長大好，大個一齊生活過又好，只要有一段共同既回憶，佢地感情差極都有個譜．

現在既我都定晒型囉，邊d親友親d，邊d無咁親，好多都根深柢固，奠定左既感情真係打風都打唔甩呀！好回味以前既時光呀！！

而家個仔仲細，佢既網絡可以係我掌握之中，我希望佢都可以係我活躍既生活圈內開開心心咁生活呢！

降低成本大行動又進一步升級

近排公司生意真係好差，"沙士"最差既時候公司都有百幾萬生意，今個月真係超級新低呀，得四十幾萬．．．無眼影啦！！

公司既降低成本大行動又進一步升級啦．．．剛剛星期五又裁個呀姐，眼見佢眼濕濕咁收撘私人物品離開，真係心酸呀．其實佢慘時，我地叫佢走都好陰工架．．．一早知道佢今日會比人裁，又唔出得聲，心裏面係難過架，但係又做唔到d乜，開口叫佢走又唔做唔得，唉！被人裁歌d緊係慘啦，年尾留留無左份工，都幾徬徨架，尤其是有家室歌d．．．我地一早知歌d都唔好受囉．．．明知佢大難將至都唔出得聲．

唉，不過比你簡，你寧願一早知呀，定係當日先知呢！！我諗這個行動仲會升級添呀．．．真係有排受呀！！好灰呀，幾時先有新機呀！！

遊長洲

我最怕最怕就係星期六係長洲架啦，因為有潔癖既老爺個個星期六都要大掃除既，張間屋番轉番轉再番轉咁大事清潔一番．．．故明思意姐係唔可以係屋企啦．．．咁你話我帶住隻仔仲可以去邊呢？？去太婆度就同表姨一齊，鬼殺咁嘈，唔係你嘈醒佢就係佢嘈醒你．．．結論係無家可歸啦！

上星期因為爸爸話陪我地係長洲喎，咁就留係長洲一個星期啦，點知情況一樣，比人澎左出門口，係無落腳到既情況下，我去就係長洲週圍走左個圈啦．．．都算係意外收獲啦，睇到咁多靚相！！

感情評估

每逄年尾又係結婚既好日子，今年我地係十一月一共收到四單紅色炸單．．．真係暈暈地！

連續飲左四日，食既野都差唔多．．．唔係差唔多呀，係一模一樣．．．好悶呀！
又要著靚靚去飲，好彩d衫全部都啱著，如果要買新衫就雙重損失囉．．．！

有個婚禮係老公既朋友黎既，出左名係好好先生，娶到個靚老婆緊係鄧佢開心啦．．．好好先生係晚宴上既一番說話真係好感人呀，聽得出佢唔係話好做作，無乜特別排練同收飾過用語，但係感情好豐富，雖然講來講去都係三覆彼，但係佢仍然講得好動聽，可能係我頭入掛，聽到眼濕濕．．．

其實結左婚既夫婦又好，拍左好耐拖既情侣都好，日子耐左無可口非愛情係會變感情，但係都應該有檢討既時候！去飲既時候聽到lee d 咁既讀到白就係最好時候啦！回想一下你當初要結婚或者要認定對方係情侣歌一種心情，重撘回那天你的承諾，檢測下你做左幾多，漏左幾多啦．．．

我一直都認為感情要好似工作咁，係要定期做評估既．．．好左或者保持到既固然開心啦，差左既咪下年做番好d囉．．．咁先有進步架麻！

惡夢

近排唔知做乜成日發埋d極度恐怖既夢，攪到我冇教好訓．．．

惡夢一
爸爸係飯廳同我講一陣要去搵呀邊個（佢舊情人），我話唔好去啦，佢好恐咁同我講一定要去呀，我仲要同佢結婚添呀，跟住我求佢唔好去啦，佢仲好惡死咁話一定要去添喎．．．我記得我醒既時候係流緊眼淚，口up up咁話唔好唔要我呀．．．嗚嗚嗚嗚

惡夢二
lee個係遠觀既夢，個夢一開始已經見到我抱住個bb坐左係天台邊，話要跳樓喎，跟住斷斷續續咁見到個bb落左地但係下面仲有一個好似吹氣牀既野墊，自己又唔知去左邊，但係我好清潔睇到個bb唔係比比黎既．．．醒既時候，足實老公隻手話好驚好驚．．．

惡夢三
我係到劏緊蟹，係個背脊到一劏，攞晒d內狀出黎，攪攪下見到我係劏完歌d唔係蟹，係小朋友．．．一隻一隻係d水裏面喎，幾得人驚呀（真好驚呀），仲恐怖既係話點解劏左都唔死既．．．跟住仲同個小朋友著番晒d衫，叫我媽咪抱住佢，氹佢訓教，訓著就會死架啦．．．醒既時候成身大汗，嚇到半死，而家諗番都好驚，實在太恐怖．

強心針

恭喜呀六呀，文化節好成功，老豆睇完都讚不絕口，但係有位在場觀眾都提點左千萬唔好作比較．．．
對，要比較就没有意思了，文化節既意義就是要把每個人不同的潛能都發揮出來，在緊密而辛苦既排練過程中磨練人生，與會員合作時要訓練人的耐性、協調能力．．．講就易囉，到你有份既時候就要緊記啦！

老豆問：呀琦（排第二既妹）跳得好放喎，同平時既呀琦好唔同喎．．．
我當時唔識回答，事後我回想我應該話：係呀呀琦真係係今次既文化節真係成長左好多呀，可能係頭入既關係啦，我係旁觀者都好感受到呀，無論跳舞的技巧，表現時的情緒啦，各方面都做得好好，亦可能係做左負責人既關係啦，就連佢既領悟能力，說話技巧好多好多野都有大進步呀！（我都要好好向佢學習，係信心上，佢不嬲都係我既前輩）

我問老豆：如果比你參加，你會參加那一環？
事後我諗我都係問錯左，我應該話：老豆有機會你一定要參加呀，就算你而家覺得無一個節目你有能力應付，到時安排左比你既，就會好神奇咁有智慧去做到最好架啦．．．

我自已都係97年參加過文化節，没有好大既進步，但係係信心上既一支強心針；希望下一次既文化節老豆都要係表演者，都要打一支信心既強心針啊！

我愛我的爸爸

爸爸同媽媽好少機會一齊去旅行，原因為屋企有三隻小狗，同埋大量既花草樹木，佢地兩個一齊去旅行，邊個放狗仔同埋淋花呀！！媽咪上個星期又同班朋友去左北京，我仲預備左相機同旅遊保比佢地添．但係我預備小左一樣好重要既野呀．．．就係要陪我既父親大人呀．．．

因為老公上星期要當間，咁我就諗住星期六日帶埋呀仔出去住，可以一解老公掛住呀仔既心，但係我竟然唔得左父親大人今個星期無左媽咪陪佢呀．．．我實在太過份啦，點可以唔記得老豆架．．．立即改變行程，誠宴老豆一齊睇姨姨既文化節表演，點知老豆一口答應，真係好開心呀，睇完仲一齊返長洲添．．．咁樣老豆先唔會咁悶啦．．．

一諗到我遺忘左老豆的一刻，我就會眼濕濕，我係鍚老豆多d既，因為媽媽已經投入左學會，已經有好充實同好幸福的人生，而爸爸就好孤單，好多時媽咪要開會，拋低佢一個食飯，我都會感覺到佢既寂寞，真係好希望好希望爸爸都可以加人學會活動呀，我都要佢好幸福！

我爸爸真係老左啦，以前既佢成日都要堅持自己的意見架，攪到身邊d人都覺得同佢一齊有壓力，但係佢而家改變左好多，好多事都可以張就張就，令身邊既人都覺得舒服左．係我眼濕濕既一刻，我有這一念，我希望我可以同佢一齊住呀，多d時間陪佢，等佢唔會咁寂寞．．．我決意／希望要做到呀！

Halloween 2008'

好多個第一次，今年又係呀仔一次過Halloween，無乜特別架，又無人攪party，不過多謝auntie Shelia啦，借左件咁可愛既南瓜衫仔比我地著，正日當晚剛剛是星期五，又可以出下中環行個圈啦，因為怕太多人所以冇去到LKF，只係係IFC行左一陣就撘車返屋企啦．．．途中仲有人搵呀仔合照添喎，成個明星仔咁．．．啊啊！！

係lee度都要多謝小比啦，因為佢既出現，令我地既生活增添好多色彩呀．

同佢裝扮比同自己裝扮去參加party，感覺好唔同，仲好似開心d添呀．．．多謝小比你任我愚欲呀！

同事三分親

時常都因為同同事既關係唔開心.
我第一二份工都應該係七八年前囉，但係我地既關係都保持得好好，到而家都仲有聯絡同聚會．可能因為咁樣啦，我對同事關係既要求有d高，希望可以之前歌d咁．

而家lee份工，個個都係妹妹仔，年青貌美，有性格；我叫做上左年紀既緊係同佢地無咁夾架啦．．．況且我又已經唔係佢地既活動範圍出未囉，話題又小啦，價值觀又唔同啦．．．就連感覺都唔同左囉！

但係我又特別醒左一醒喎，事原係一對好友啦，拍左他都有十幾年啦，近日分左手，個女仔痛不欲生，成日都話想死，但係見到有個朋友留言比佢話，其實個男仔只係你生命既一小部份（十幾年都算一小部份，唔係掛！），你唔需要太在意佢架．．．我又諗反，lee班同事都係我生命既一小部份，唔需在太在意佢地點睇我啦！
對呀！就用咁既想法啦，咁就唔會唔開心架啦！

郊遊日誌－小插曲

咁又話說爸爸歌晚８點鐘要去中環幫個客開部機，咁咪又要帶埋部手提電腦去，一抽二能咁煩．咁就諗左一個好辦法啦，就係諗到中環碼頭有個locker，先放部手提電腦係locker先，返黎先攞咪得囉．Yeah!!
一睇之下，覺得太正啦，只係需要$10就可以用個大既，簡直正到暈呀．

當我地走既時候一返到去，攞返張票尾黎諗住開番門擺野出黎啦，佢竟然話尚欠HKD$110元．．．吓，唔係掛！點會咁架，又話10蚊雞．原來係要計時間架，每半個鐘10蚊雞呀！！！！．．．死死氣打散張100蚊，入左十一個大幣入去先可以擺番個手提電腦．．．我地一直都無諗過係用時間計既，大無私樣咁以為10蚊雞就攪掂，點知．．．就中左照啦．

其實歌日咁緊密既行程呢，我地除左交通費外都無其他開支，想買野食都冇得買，只係有兩件免費旦榚同埋一支蜜桃茶之外係冇野食囉．．．（其實好肚餓架），最貴既原來係個locker，激死！

認住佢啦！！

郊遊日誌

話說上星期經琦姨既極力慫恿之下，我地去左大埔既山寮啦，姐係我地既大埔綜合文化中心．

未出發先興奮，仲係Facebook話好開心，因為可以帶個仔去郊遊．
第二日係Facebook係話郊遊完，攰到呀媽都唔認得！！
點知我實在諗得太簡單啦，原來計計下，一程都要三四個鐘呀，先係由長洲撘船出發－再轉天星小輪－再撘巴士271入到大埔－再轉巴士75k入去山寮．．．呀仔開頭都好乖係車係船都大教訓，但係再轉75k既時候已經無晒耐性啦，勁叫，勁喊，要落車，果然一落車就收晒聲．

不過呀仔去到都玩得好開心，一見到一大扁草地既時候，笑到出晒聲喎，唔知係咪小朋友接觸到大自然既時候心情都特別開朗既呢！熱左身之後就精彩囉，見乜都玩一餐，笑笑笑．．．玩玩玩．．．無幾耐，就玩到謝晒皮囉．．．回程既時候係一教訓到返中環碼頭呀！！

我的教育理念

星期二打編blog "世界太美只因有你" 有好多回應，個個都話好感動，可能我打既時候係發自內心啦！同時都好多人質疑我，問我咩叫好既成長環境先，冇錢點比最好既野小朋友呀，冇錢點有最好既成長環境呀？？？

我既價值觀，從來都唔係把＄＄放係第一位既，未有小朋友前，我會把開心放第一，而家就把小朋友既未來放第一，我既理論係 "多有多洗、小有小洗"，總之有糧出就乜都得 ．

我成日都講，有幾多人戶口有幾百萬來養個仔呀，咁戶口冇幾百萬既父母係咪代表d仔女會生活得唔開心呀！

我冇錢買幾萬蚊既Disney Learning Card比我個仔，但係我會盡力抽時間陪子女一齊學習．
我亦都冇錢請私人教練比仔學東學西，但係我盡我精力同時間去培育我既下一代．

你地要張個小朋友定型為一定要做醫生、律師、會計師，緊係辛苦啦，緊係會覺得養個小朋友艱難啦！
我要求好簡單，呀仔要有一個和睦既家庭、正直明朗有同情心既人格、養活自己既能力，就係咁簡單架啦！
我確信既係 "人本教育" 以人為本呀，怎樣把人既本質發揮出來；而唔係點樣要下一代照著自己既路走．

問題其實很簡單，"好" 其實係相對，你睇睇以下既比較就會知其實 "好" 可以好簡單．












其實我並唔想把這些令人聞者傷心、見者流淚既照片放係我既blog度，但係人往往都係善忘既（包括我自己），所以都要以lee d咁現實既圖片來提醒自己．

過馬路

慳錢大計已經實行左一星期左右啦，出奇地都算順利．起碼未試過朝早想訓多十分鐘而趕唔到慢船，每朝唔係鬧鐘就係呀仔叫醒我，成績都唔錯；而放工呢，就大無私樣咁準時放工啦，大佬減左人工仲同你咁博命咩，唔早走都算係好員工啦！又唔係慳得好多，不過好似做左野抵消返，心理因素會舒服左．．．啊啊！！

不過我發現一樣野，原來我係唔識過馬路架．大大話話我都好耐無自己過馬路囉！唔係誇張呀，我之前住柴灣，係金鐘返工，返工到放工再去埋超市買野，都唔洗過馬路既；柴灣返長洲有我最喜愛既城巴780，簡直係專車由門口送到去中環碼頭；平時出街拖住老公隻手，係馬路打橫行，佢成日都話最多車既馬路就係最安全既．．．好啦，今時今日要行路返公司，大大話話都要過六七條馬路架麻，點知呢：

望左，d車就係右邊出，望右，d車就係左邊出；見人行我又行喎，自己又行得慢，成日行到一半又轉左紅燈喎；明明見到冇車既，行到一半，又唔知係邊度走間車出黎喎；

唉，成日都比車必到我三魂唔見左七魄，真係有機會比車車死架我，陰公！！

世界太美只因有你

我諗極都諗唔明點解咁多人會選擇唔生小朋友！
無錯，佢地會霸佔晒你的時間、心情、金錢、屋企既空間．．．所有所有野；但係佢回饋給父母既野真係冇野可以取代架！

我幾唔開心，見到個仔笑，真係咩都唔記得晒！佢唔係一個負資產，佢我係生存既動力，就係因為佢既出現，我要使我既生活更充實，我要學多d野，教佢多d野；我要改我既壞習慣，比佢一個好既身教；我要盡我所能，比一個好既成長環境佢．

爸爸之前係一個出名懶到出汁既人，而家半夜起身開奶，見到個仔食飽飽，四萬咁既口對住佢笑，佢都話攰都抵既．山長水遠好似走難咁帶個仔去玩，佢都話冇所謂，因為見到呀仔玩到見牙唔見眼．

我諗人真係會為左下一代先會把佢地既潛揮得淋漓盡致，尤其係好似我地咁有惰性既人！

節衣縮食

話咁快腦細真係同我地講，你地lee個grade要幫公司慳下錢啦(心諗一定冇好野啦)，而家唔係話要減人工，不過而家張你地既人工同公司生意額掛鉤．

腦細　：如果生意額維持到總行做到10,920,000或分行做到17,000,000，你地既人工就維持不變啦；低過就要減xxxx咁多啦；咁我好公平既，如過過左lee個數呢，就按比例加番比你地啦！

講咁多做乜鬼呀，減就減硬架啦，整式整水！

知道要減人工緊係第一時間話比老公知，比個心理準備佢先，跟住我地就諗下慳錢方法啦，結論係：

每朝早二十分鐘出問口就可以撘慢船，以後盡可能會出入都撘慢船啦，原來每個月可慳成四佰幾蚊．
撘車同行路都差唔多時間返到公司，咁以後就來回都行返工啦，忡可以當自己做左運動，咁樣每月都慳到二佰蚊到啦．

唉，諗黎諗去都係慳得幾舊水．．．而家講緊要減四位數字既人工呀．．．點過活呀，十一月仲有三隻紅色炸彈呀！！！

家庭樂

爸爸買左部新相機，我地連假期都有著落呀，因為爸爸要試機，所以可以一齊出去玩．

今次我地去香港公園，因為走既時候方便返長洲．

其實都幾攰架，一個要抱住呀仔，一個就要攞住晒d行理呀相機呀，所以應該係兩個都好攰；但係小比都應該好攰，因為佢不停咁睇野，行到邊睇到邊，眼訓到暈都唔願訓，所以係三個人都好攰既！但係都係抵既，因為好開心！！

我老闆

我同個仔講左架啦，如果經濟再差可能唔可以返lee間學校架啦！
我又同個女講，食野唔好咁晻尖啦，經濟再差可能日日食罐頭架啦！

以上係我聽到老闆既電話對話．

有冇咁誇張呀老闆，以你既家財，供埋我個仔去歌間學校讀書都卓卓有餘啦；以你既家財，日日餐餐請埋我地食九大鬼都卓卓有餘啦．同對仔女講埋d咁既野，都唔知咩心態！

一個月前，佢已經日日係公司講要cut cost架啦，又話唔加人工又話咁又話咁，近來仲激，話要減薪喎，我緊係當聽唔到啦！

老闆，你日日同我講今年比舊年小左好多數，生意唔好（心諗：我出埋去跑數都無補於事架啦，我可以點呢？）
老闆，舊年咁好數，生意又咁好，我分得你雞碎咁多喎！
老闆，我唔係同你profit sharing喎，你小左生意，我都想同你慳錢，但係我都要生活架！
老闆，經濟由第三季先開始轉差，你已經諗定咁多縮數，邊有生意實賺架，唔洗守架，你去做殯儀啦，經濟差都有人死架！

想點死呀？

唔知係咪個個都有過自殺既諗頭呢？但係有冇諗過點樣自殺呢？？

跳樓死？點樣上到去頂樓呀？天台門有有鎖呢？
食藥死？食咩藥呢？食感冒藥死唔洗得呢？
開煤氣？要開幾耐先死得呢？
割脈？　要割到幾深呢？

其實有自殺既一諗好可能係一時衝動，但若果係成功自殺的話應該唔係一時衝動，而係有計劃既．

其實好多人都覺得（包括我自己啦）點解d人咁傻呀要自殺，有咩諗唔開姐．．．世界咁美好！

但係情緒病真係一種病黎架，個人一旦控制唔到思路，再轉一轉牛角尖，就容易就出事架啦！
未預過情緒有問題既人未必會明白，但係打個比喻，情緒病就好癌症咁，開始病發既時候可能冇人發覺，到嚴重的話，自己根本已經控制唔到，要睇醫生囉，或者借助一d外界既藥物來幫一幫手囉，太嚴重既真係可能冇得救架啦！

並不是每個人都享受坦蕩蕩

一次跟老公的呀姨說了幾句內心話（當然係訴說跟老爺奶奶相處的問題），估不到她在我背後高調討論我的問題．

其實某部份問題是解決到的，我都有一刻感到開心，但想到我部份的心底話被人供開並當作話柄高題並論，我覺得問題更加嚴重，我有著一種被裸露了的感覺．我極度討厭這種感覺，很不好受．

今次的教訓就是不是親人就不能當她是親人．

唔係親人的話，心就好似這個湖既水咁．．（冰水，因為lee個湖係冰島）

新相機

比比爸爸終於的起心肝買左部新相機啦!!

臨入鋪頭既時候，爸爸話等陣我抱住比比，你去試機呀！
吓．．．我呀，我只係識用傻瓜機喎，太複雜既我唔識喎！算啦，爸爸次次都係咁既，佢自己唔識歌d就推我去死架啦．．．慣晒！！

入到去，問多兩問個Sales都知我地係新手黎架啦，咁就sale我地買格平d，易用d既機...咁我地係没乜定力既情況下買左一部未睇過既機返屋企啦...

返到屋企呀爸爸又話lee個鏡頭係Made in China喎...唔夠Made in Japan個Cannon型喎...
小喇叭呀，你一張相都未影到，咁快就話咁多野講，仲講埋d咁無謂野．．．所以我係冇理佢既！！

思想空間

近大半年既生活都好枯燥，因為係到處理緊一個大project，就係傳宗接代，生左個小朋友．

而家除左返工，就係揍仔，就算有機會出去玩，都係掛住個仔既．．．自己根本冇晒時間．就連睇書呀，搵新啫好既時間都冇晒．．．

所以大家見到我近一年半截既blog都係圍繞住自己大肚同埋個仔d野．．．連自己都覺得有d悶．唔知係咪個個呀媽都係咁既呢？？？？？？

思想空間接近零，個腦裏面除左點樣揍個仔遠離長洲外，就係諗住兩年外可以接呀仔出黎住．．．根本冇其他野諗緊．仲有搵晒成本相簿都係呀仔d相，原來自己近半年都冇份入鏡．．．自己都覺得好笑！！

我唔想呀，十萬個唔想呀，唔想做黃面婆呀，唔想開口埋口都係講揍仔既野呀！！！！救命呀！！！！

國慶日

呀仔今年過既第一個國慶日．．．雖然都係冇乜特別，但係剛剛有件有國旗既衫仔，咁就攪到我地好似去慶祝咁，其實呢係咁啱得咁喬姐．．．不過又幾得意既！